Zin in Zondag | De dominee komt voorbij | Jan Leijenhorst

Daor mot ze toch wal wat an doone

Luister hier naar het fragment

"Daor mot ze toch wal wat an doone."
Iedere kaere mot ik mi’j weer 'as het ware bi'j de krage vatten’ um neet
met te gaon doone. Want het geet vake gewoon vanzelf, metdone met
klagen.
Zit i’j op een visietje, een verjeurdag, een buurtfeest. Begunt der ene
met het vertellen ovver wat der allemaole mis is in bieveurbeeld ’t onderwies.
Gegarandeerd hef een ander daor ok wat ovver wet te zeggen,
en npog wee een ander ok nog.
En ik mot aerlek waen, dan heb ik ok de neiging um daorovver ok nog
wat te willen zeggen. Want ik heb jo ok met het onderwies te maken
ehad, jaoren lang les egovvene.
En dan is het zo verleidelijk um met de doone en te vervallen in een klageri’je.
Klagen ovver wat der allemaole mis geet: umdat de regering de
verkaerde keuzes mek, umdat het bovvenschoolse management de gelden
neet good beheerd, umdat de olders altied maor weer loopt te zeuren
en alleneg an eure eigen kinder denkt, dee ze ok nog neet ens fatsoenlijk
könt opvoeden.
En zo wieter en zo verdan.
De regering, de zorgverzekeraars, de multinationales, de supermarkten,
de managers …. en gao zo maor wieter, 'dee mosten der toch ens wat an
done.'
'Iederene mos het eigenlijk anders doone. Dan gingen de dinge völle
baeter. En wi’j wet wal hoo of het anders mot.' Dat is meestal de conclusie
an ’t ende van zo'n klaaguurtje.
Lang geleen was der nen koning. Disse koning had deur zien dienaars 'n
groot rotsblok midden op de weg laoten leggen. Zelf ging hee achter een
struuke zitten um te zeene wat of de ging gebeurn.
Der kwamen een hoop leu ovver den weg.
Handelsleu, dee-t van stad naor stad gingen met eur handelswaar, burgers
dee-t naor 't wark en weer naor huus opan gingen, bestuurders van
de stad dee-t naor vergaderingen gingen, boeren van en naor 't land.
Iederene leep um dat rotsblok hen en leu met een kaore of wagen hadden
der knap völle last van. Mosten vaka helemaols deur de berm.
Iederene hat der dan ok wal wat ovver te zeggen. ’t Kommentaar was
neet van de locht.
'Waor kump dat rotsblok toch vandan, wee hef dat daor neer elegd,
waorumme dut gin mense daor wat an. Dat kan toch zo neet, schande.'
Der bleven der ok effen staon um samen te klagen ovver de wegbeheerder,
dat den daor maor niks an dee, de gemeente neet, de regering neet,
dee hadden toch zeker….?
En uutendelijk was het natuurlijk allemaole de schuld van de koning,
want den was toch de hoogste baas en mos toch veur iederene zorgen?
De koning heuren dat allemaole an en wier steeds verdreetiger.
Dat ging zo, töt der een olden man ankwan met in ziene hande twee
mende met varse greunte.
Ton den man het rotsblok zag, leggen hee de mende met greunte neer
en proberen het rotsblok weg te duwen.
Hee kreg der gin bewaeging in, dat trotsblok völ te völ zwaor.
Ton hee zo an’t äösen was kwam der ne jonge deerne an, op weg naor
schole, ze zoog de olden man ploetern en vroog: 'zal ik helpen?'
En veur den man antwaorden kon, duwen ok zee teggen dat rostblok.
Twee vrouwleu, net trugge van de markt, zagen dat, en begonnen met te
helpen. En een jongen kaerl, den op weg was naor zien wark, stak ok de
handen uur de mouwen.
En het duurn neet lange of het rostblok lag an de kante van de weg.
De koning ston op vanachter de struuken vandan en hee bedanken de
olde man, de deerne en de vrouwleu en de jongen kaerl en neugen eur
uut um met te kommen naor zien paleis veur een feestmaol.
Den aovend leet hee heel het volk wetten wat der gebeurd was en iederene
begreep dat klagen neet hulp, netzomin as verwachten dat een ander
der wat an dut.
Zelf beginnen met opstaon. Dat kö-j.
Neet bi’j de pakken neerzitten, neet denken: ik kan daor toch niks an
doon, da’s mi'j te groot, das mi’j te zwaor. Maor ’t waogen um gewoon te
beginnen met ’t goode doon. Dat neudigt andern uut um met te doone.
Dat is ok de kern van het verhaal van paosen.
In opstand kommen teggen wat mensen klein hölt, wat mensen kapot
mek, gewoon good doone.
Jezus is daormet al begonnen. En wi'j könt methelpen om het rotsblok
van alles wat dood en verderf anbrech, aan te pakken en zo mögelijk
weg te rollen.
Zodat der weer ruumte van laeven kump.

💬 WhatsApp ons!
Heb jij een tip of opmerking? Stuur ons een bericht op 06 - 220 543 52 of stuur een mail: omroep@gld.nl!